ها بوجور ديالكم. اليوم فيا شوية ديال النعاس، واللي جاني على لساني غادي نقولو.
هاكاوا على شباب التغيير. هاكاوا على شباب إسقاط الاستبداد. هاكاوا على شباب محاربة الفساد. والله يلا حشومة. زعما ضريتوني فخاطري الله يغفر ليكم.
واش أعباد الله هادي حركة ديال 20 فبراير ولا حركة ديال عشرين بونية. واش أعباد الله هادوك جموع عامة، ولا جموع ديال الدم. والله العلي العظيم ما بقيت فاهم شي حاجة فيكم
شكون مع شكون؟ وشكون ضد شكون؟ وشكون باغي شنو؟ وعلاش وكيفاش ومنين ووقتاش؟ تخلطات بالمعقول
البارح زغبني الله عاوتاني ومشيت نشوف آش كاين. نغمونا شوية بالشعارات فاللول، واخا كاين شي شعارات ما عندها علاقة بآش واقع كاع، عاجبهم فير اللحن ديالها. أنا بقيت حاضي غير الوجوه ديال عباد الله، شي كيقول الشعارات ومخشع معاها، وشي غير كيصفق، وشي غير داوي. الواعرة هي واحد من العدل والإحسان بان لي بحال مروان الشماخ ملي كيكون النشيد الوطني فشي ماتش، ما حافظو ما فاهمو. الناس مولفين غير بشعار: خيبر خيبر يا يهود.
بيني وبينكم الحركة فيها دراري واعيين وفاهمين ويخليوك حال فمك ملي يبداو يناقشو، وفيها شي وحدين ووحدات غير مقصرين مع الوقت، عاجبهم الرواج وصافي. راه زوينة تسمى مناضل، وكتقلي السم للدولة. واو…
،الحاصول الدراري آش غادي نقول ليكم، الله يخرج العاقبة على خير، وهاد المرة اللي بغا يمشي يحضر شي جمع عام ديال 20 فبراير فكازا يدي معاه شي كاصك صحيح، وخاص غلاب يدخلهم معاه فالحملات ديال حوادث السير، ديك اللعيبة ديال الدلاحة زوينة.
تشاو تشاو عليكم.
