والله يا الإخوان، وما تسالوني حلوف، يلا راني حاس بواحد الحالة ديال الإحباط لا تتصور. كنحاول نفهم شي حوايج كيزيد يضرني راسي، وكتجيني الشقيقة عافاكم الله وشافاكم.
دابا، مثلا، بغيت نفهم علاش واحد بحال بادو الزاكي عندو كريمة ديال الكار؟ الراجل ميسور ولاباس عليه، الله يزيدو، وما زال عندو كريمة من فوق هاد الشي كامل؟ تقولو لي راه عطاوها ليه، نقول ليكم ما كاين باس: الهدية لا ترد، خصوصا يلا جات من الفوق، ولكن ما فيها باس يلا الزاكي، واللي بحالو، يديرو شوية ديال النفس والروح الوطنيةة والإنسانية، ويديرو شي جمعية ويتبرعو.
عمركم سمعتو باللي واحد بحال الزاكي، ولا الكروج، ولا النيبت، عطا شي هبة لشي جمعية؟ عمركم سمعتو شي نجم من النجوم ديالونا دار شي مشروع خيري؟ علاش زعما حنا فهاد البلاد ليسطار ديالولنا كيعرفو غير ياخدو ويجمعو الفلوس؟ علاش الناس اللي لاباس عليهم ما فيهم شوية ديال الوطنية، ويديرو جمعيات ولا أنشطة يجمعو الفلوس للناس اللي ما فحالهمش؟
واخا أسيدي، الزاكي عطا بزاف للبلاد، ما قلناش العكس، ونوال المتوكل حتى هي، وزيد عليهم بصير، وزيد عليهم سعيد عويطة، ولكن واش يعرفو غير ياخدو من هاد البلاد؟ واش نبقاو ديما كنقولو هادوك راهم دارو ودارو ودارو وخاصهم ياخدو؟ ما يعرفوش يدوقو شوية الناس اللي ما فحالهمش؟
النجومية يا الخوت ماشي غير الفلوس والكريمات والأبهة ونبانو فالتلفزيون، راه اللي نجم خاصو يكون مثال لعباد الله، ماشي منشار طالع واكل نازل واكل واقف واكل.
شوفو سيادكم إيطو، وأفلاي، وبنعزي، بلا ما تشوفو النجوم ديال أروبا وميريكان.
دابا علاش منى فتو شي نهار ما تشدش شي لباس ديالها وتبيعو فشي مزاد علني، واخا يجيب لينا غير 20 ألف ريال، وتعطي الفلوس لشي جمعية؟
علاش النيبت ما ياخدش شي ميدالية من داك الشي اللي عندو ويبيعها ويعطي الفلوس لشي دريري صغيرو فقير باغي يمشي بعيد فالقراية؟
علاش الكروج ما يديرش شي مدرسة يقري فيها الدراري الصغار على حسابو؟ ولا يمشي يصاوب شي طريق فبركان نسميوها: شارع هشام الكروج؟
علاش أعباد الله؟ واش ما عندكم نفس على البلاد؟ ولا البلاد كتعرفوها غير فالكريمات؟
الحاصول خليونا ساكتين.
تشاو تشاو.
